فیل و سیچان بالاسی
لاپ قدیملرده بالاجا بیر سیچان بالاسی وار ایدی. اونون بیر گوزگوسو
وار ایدی. بو گوزگو ساده گوزگو دئییلدی، سئهرلی ایدی. کیم بو
گوزگویه باخسا ایدی، اؤزونو بؤیوک و قوووتلی گؤرردی. سیچان بالاسی
دا همیشه اؤز سئهرلی گوزگوسونه باخار، اونا ائله گلردی کی، او ائله
دوغرودان دا دونیادا تایی برابری اولمایان ان بؤیوک و گوجلو
حئیواندیر. سیچان بالاسی او بیری سیچانلارا چوخ یوکسکدن باخماغا
باشلامیشدی. اونلارلا اویناماق، حتی دانیشماق دا ایستمیردی.
او، جده اوتوروب لووغا-لووغا اؤز بیغینی تومارلایار، یا دا اؤز
جومبولو آیاقلاریله یئری تاپدالایاردی، قولاغینی تورپاغا قویوب قولاق
آساردی کی، گؤرسون آیاغی‌نین ضربه‌‌سیندن یئر تیتره‌دی، یا یوخ!
اونون هئچ آغلینا گلمزدی کی، دونیادا اوندان بؤیوک و گوجلو
حئیوان اولا بیلر.
باخین، بو سیچان بالاسی بئله تکببورلو ایدی! بیر دفعه اونون تجروبه‌لی
و قوجا سیچان اولان خالاسی دئدی:
- باجی‌اوغلو، باخ ها، احتیاطلی اول! هامی بیلیر کی، سن چوخ لووغالانمیسان
و اؤزونو بوتون حئیوانلاردان قودرتلی اعلان ائتمیسن.
آنجاق یادیندا ساخلا کی، سنین اؤیونمه‌یین فیلین خوشونا گلمیر.
- هله بیر فیل نه دیر؟ - دئیه سیچان بالاسی جیگیلده‌دی. - هانسی فیل؟
فیل نه دیر؟ اشی، اونو بیر بورا چاغیر گؤرک! من بیر گؤز قیرپیمیندا
اونونلا حسابلاشارام!
سیچان بالاسی‌نین خالاسی دونیادا چوخ عومور سورموشدو و چوخ
شئیلر گؤرموشدو. او، بیغالتی گولومسونوب دئدی:
- فیل، دونیادا ان بؤیوک حئیواندیر. ائله بیر حئیوان تاپیلماز
کی، اوندان قورخمامیش اولسون.
- اولا بیلمز کی، هانسی بیر فیل ایسه مندن قوووتلی اولسون،
- دئیه سیچان بالاسی جاواب وئریب فیلی تاپماغا گئتدی.
او، مئشه تالاسیندا یاشیل کرتنکله‌یه راست گلدی.
- بیر دئ گؤروم، فیل سنسن؟ - دئیه سیچان بالاسی سوروشدو.
- یوخ، من کرتنکله‌یم. فیل سنین نَیینه لازیمدیر؟ - دئیه
کرتنکله ماراقلاندی.
- دعا ائیله کی، سن جانینی منیم الیمدن قورتاردین. اگر سن
فیل اولسایدین، من سنی پارچا-پارچا ائدردیم! - دئیه سیچان بالاسی
قیشقیردی.
بالاجا سیچان بالاسی‌نین ائله گولمه‌لی اوزو واردی کی، کرتنکله
اؤزونو ساخلایا بیلمه‌ییب گولدو.
سیچان بالاسی حیرصلندی، اؤز گوجونو اونا گؤسترمک اوچون آیاغینی
یئره ووردو. تصادفن گرک ائله ایلدیریم دا همین او آندا چاخا ایدی!
یاشیل کرتنکله قورخدو، تئز اؤزونو داشین آلتینا سوخدو. اونا
ائله گلدی کی، بو گورولتونو سیچان بالاسی قالدیریب.
گؤر من نئجه گوجلویم!” - دئیه سیچان بالاسی دا بو آرالیق
اؤز-اؤزونه دوشونوب قاچدی.
بیر آز گئدیب بیر بؤجه‌یه راست گلدی.
- ائی، دایان، سن، تصادفن فیل دئییلسن؟ - دئیه اوندان سوروشدو.
بؤجک اؤزونو ایتیردی.
- یوخ، - دئیه دیلی توپوق چالا-چالا جاواب وئردی. - من فیل
دئییلم، بؤجه‌یم.
- اوندا سنین بختین گتیردی! سئوین کی، سن فیل دئییلسن. یوخسا
من سنین سور-سومویونو یئرله یئکسان ائتمیشدیم!
بؤجک بو سؤزلری ائشیدیب آنجاق گولومسوندو. اوندا بالاجا سیچان
بالاسی آیاغینی یئره ووردو کی، بؤجیی قورخوتسون. آنجاق بو
دفعه ایلدیریم چاخمادی.
سیچان بالاسی آیاغینی یئره بیر ده ووردو، یئنه ده ایلدیریم چاخمادی،
هئچ بیر ضعیف سس ده چیخمادی!
یقین کی، یئر یاشدیر. اونا گؤره سس چیخمیر!” - دئیه سیچان بالاسی
اؤزلویونده دوشوندو، قاچیب یولونا داوام ائتدی.
او بیر نئچه مئتر قاچمامیشدی کی، قریبه بیر حئیوانا راست گلدی.
او حئیوان آغاجین یانیندا اوتوروب یازیق-یازیق باخیردی.
باخ، یقین کی، بو فیلدیر! - دئیه سیچان بالاسی دوشوندو. - او،
منی گؤروب، دویوب کی، من نه اوچون گلمیشم، اونا گؤره ده بئله
درده-قمه باتیب”.
- دئ گؤرک، سن فیلسن؟ - دئیه سیچان بالاسی مولاییملیکله سوروشدو.
حئیوان، سیچان بالاسی‌نین سوالینی ائشیدیب گولومسوندو و بئله
جاواب وئردی:
- یوخ، من فیل دئییلم، آنجاق من دونیا اوزونون آغاسی‌نین
دوستویام. من ایتم.
- بس او دونیا اوزونون آغاسی کیمدیر؟ - دئیه سیچان بالاسی سوروشدو.
ایت دئدی:
- اینسان!
- یوخ اشی؟ بختین گتیردی کی، سن ایتسن. اگر فیل اولسایدین، ایشین
یاشدی! آنجاق یادیندا ساخلا کی، دونیانین یئگانه آغاسی منم،
اینسان دئییل! یاخشی اولار کی، سن اؤز سؤزلرینی گئری گؤتوره‌سن.
ایت ایسته‌دی کی، بو لووغانی بیر آز اله سالسین:
- سن دوغرو دئییرسن، قودرتلی حئیوان! حتی اینسانلار دا سنین
اوچون ایشله‌ییرلر. اونلار تاخیل اکیب-بیچیرلر، سن ده اونو یئییرسن!
ایت بونو دئییب، قاچیب اؤز یولو ایله گئتدی.
سیچان بالاسی دا یولونا داوام ائدیب مئشه‌نین لاپ درینلیکلرینه
چاتدی. او، بورادا داغ بویدا بویو اولان حئیوانا راست گلدی، اونون
آیاقلاری آغاج گؤوده‌سی یوغونلوقدا ایدی، ایکی قویروغو واردی: بیری
اوزون - اؤزو ده قاباقدا ایدی، او بیری قیسا ایسه دالدا ایدی.
- اولمایا سن فیلسن؟ - دئیه لووغا سیچان وار گوجویله قیشقیردی.
فیل اطرافا باخیب هئچ کسی گؤرمه‌دی. سیچان بالاسی بؤیوک داشین
اوستونه دیرماشیب چیخاندا فیل دقتله باخیب اونو گؤردو.
- بلی، من فیلم، - دئیه جاواب وئردی.
- سن نئجه جورت ائدیب منی اله سالمیسان و حیرصله هدله‌میسن!
- دئیه سیچان بالاسی قیشقیردی، آیاغینی داشا ووردو. بو دفعه ده
ایلدیریم چاخمادی.
سیچان بالاسی‌نین غضبی فیلین هئچ دوداغینی دا قاچیردیب گولدورمه‌دی.
او، ساکیتجه خورتومونا سو آلیب هددینی آشان سیچان بالاسی‌نین
اوستونه تؤکدو. بیر گؤز قیرپیمیندا سو - اؤزونوؤیه‌نی داشین اوستوندن
یویوب یئره سالدی. سیچان بالاسی آز قالا سودا بوغولاجاقدی.
آنجاق بیر تهر اؤزونه گلیب گوج-بلا ایله نوهوردان چیخدی.
سیچان بالاسی هئچ گؤزلمیردی کی، فیلله اونون داواسی بو جور روسوایچیلیقلا
قورتارار.
سیچان بالاسی سویو سوزوله-سوزوله ائوه قاییتدی. ایندی او بیلیردی کی،
دونیادا اوندان چوخ-چوخ قوووتلی حئیوانلار وار. سیچان بالاسی او
واختدان بری داها بیر ده لووغالانمیر و اؤز گوجو ایله اؤیونمور.
اؤزونون سئهرلی گوزگوسونه ایسه اوندان سونرا بیر ده باخمادی!
آتانین دوغما اوغلونون توخومونو
سیچان ,بالاسی ,کی، ,بیر ,فیل ,دئیه ,سیچان بالاسی ,دئیه سیچان ,کی، سن ,سیچان بالاسی‌نین ,بؤیوک و ,دئیه سیچان بالاسی ,ایلدیریم چاخمادی سیچان ,سیچان بالاسی آیاغینی ,سیچان بالاسی سوروشدو
درباره این سایت